Se o tempo climatolóxico nos deixar, esta semana faremos unha saída moi pertiño da escola. Visitaremos os petróglifos (si, pronunciado así, que é palabra esdrúxula) de Rozacús. Son seis rochas situadas no lugar de Fontiñas, nunha aba do monte do "Alto do Coello", gravadas con variedade de signos; unha delas recibe o nome de Rozacús porque foi tradición de moitas xeracións de nenos e nenas o seu uso como tobogán, xa que logo, por asimilación o conxunto recibe o nome de Petróglifos de Rozacús. Non se coñece con exactitude a súa idade mais pódese supor que, como a maioría dos petróglifos galegos, a súa cronoloxía está entre o III e o II milenio a.C.
